నిజమైన లబ్ధిదారులకే ఇందిరమ్మ ఇళ్లు మంజూరు చేయాలి

చిల్పూర్‌, అక్టోబరు 22 (ప్రజాధ్వని): చిల్పూర్ మండలంలోని అన్ని గ్రామాల్లో ఇందిరమ్మ ఇళ్లను అర్హులైన నిజమైన లబ్ధిదారులకే మంజూరు చేయాలని చిల్పూర్‌ మండల బీఆర్‌ఎస్‌ నాయకులు డిమాండ్‌ చేశారు. ఈ మేరకు బీఆర్‌ఎస్‌ చిల్పూర్‌ మండల పార్టీ ఇన్‌చార్జి మాలోత్‌ రమేష్‌ నాయక్‌ ఆధ్వర్యంలో గురువారం మండల పరిషత్‌ అభివృద్ధి అధికారి (ఎంపీడీవో)ను కలిసి వినతిపత్రం అందజేశారు. ఈ సందర్భంగా నాయకులు మాట్లాడుతూ.. ప్రభుత్వం పేదలకు ఇళ్లు మంజూరు చేసే విషయంలో ఎలాంటి రాజకీయ పక్షపాతం, వివక్షకు తావులేకుండా పారదర్శకంగా వ్యవహరించాలని కోరారు. మండలంలోని పలు గ్రామాల్లో నేటికీ అనేకమంది నిరుపేదలు గుడిసెలు, పెంకుటిళ్లలో నివసిస్తూ తీవ్ర ఇబ్బందులు ఎదుర్కొంటున్నారని తెలిపారు. వర్షాకాలంలో ఇళ్లలోకి నీరు చేరడం, శిథిలావస్థకు చేరిన నివాసాల్లో జీవనం సాగించడం వంటి సమస్యలతో పేద కుటుంబాలు సతమతమవుతున్నాయని పేర్కొన్నారు. అలాంటి నిరుపేద కుటుంబాలను గుర్తించి వారికి ఇందిరమ్మ ఇళ్లు మంజూరు చేయాల్సిన బాధ్యత అధికారులపై ఉందన్నారు. ప్రస్తుతం విడుదలైన ఇందిరమ్మ ఇళ్ల లబ్ధిదారుల జాబితాలో పలు అవకతవకలు చోటుచేసుకున్నాయనే అనుమానాలు వ్యక్తమవుతున్నాయని నాయకులు పేర్కొన్నారు. క్షేత్రస్థాయిలో వాస్తవ పరిస్థితులను పరిశీలించకుండా జాబితా రూపొందించినట్లుగా పలువురు అర్హులు ఆవేదన వ్యక్తం చేస్తున్నారని తెలిపారు. అర్హత ఉన్నప్పటికీ కొంతమంది పేదలకు జాబితాలో చోటు దక్కలేదని, దీంతో వారు ప్రభుత్వ పథకం ద్వారా అందే లబ్ధికి దూరమయ్యే పరిస్థితి ఏర్పడిందని ఆవేదన వ్యక్తం చేశారు.

కాబట్టి అధికారులు గ్రామాల వారీగా సమగ్ర విచారణ చేపట్టి, ప్రతి ఇంటిని క్షేత్రస్థాయిలో పరిశీలించాలని కోరారు. గుడిసెలు, పెంకుటిళ్లలో నివసిస్తున్న నిరుపేదలు, సొంత నివాస సౌకర్యం లేని కుటుంబాలను గుర్తించి అర్హత ప్రాతిపదికన లబ్ధిదారుల జాబితాలో చేర్చాలని విజ్ఞప్తి చేశారు. ఇప్పటికే విడుదలైన జాబితాలో ఏవైనా తప్పులు, అక్రమాలు ఉన్నట్లు తేలితే వాటిని సరిదిద్ది, అర్హులైన ప్రతి ఒక్కరికీ న్యాయం జరిగేలా చర్యలు తీసుకోవాలని ఎంపీడీవోను కోరారు. ప్రభుత్వ సంక్షేమ పథకాల ఫలాలు నిజమైన పేదలకు అందినప్పుడే వాటి లక్ష్యం నెరవేరుతుందని, రాజకీయాలకు అతీతంగా అర్హుల ఎంపిక జరగాలని వారు స్పష్టం చేశారు. ఈ కార్యక్రమంలో మండల ముఖ్య నాయకులు రాజన్‌బాబు, లింగంపల్లి, కొండాపూర్‌, కృష్ణాజిగూడెం గ్రామాల సర్పంచులు, లాలు నాయక్‌, దేవేందర్‌, మల్లం రవి, మరపాక రమేష్‌, మర్రి శ్రీధర్‌, వివిధ గ్రామాల వార్డు సభ్యులు, గ్రామ అధ్యక్షులు, పార్టీ ఇన్‌చార్జులు, మాజీ సర్పంచులు, ఎంపీటీసీలు, మహిళా నాయకులు, యువజన నాయకులు, తదితరులు పాల్గొన్నారు.