ఎల్‌నినో పేరుతో తెలంగాణను ఎడారిగా మార్చారు

స్టేషన్‌ ఘన్‌పూర్‌, అక్టోబరు 25 (ప్రజాధ్వని): ఎల్‌నినో ప్రభావం పేరుతో తెలంగాణ రైతులను సాగునీటికి దూరం చేస్తూ రాష్ట్రాన్ని ఎడారిగా మార్చే ప్రయత్నం చేస్తున్నారని మాజీ ఉప ముఖ్యమంత్రి, బీఆర్ఎస్ నాయకుడు డాక్టర్ తాటికొండ రాజయ్య రాష్ట్ర ప్రభుత్వంపై తీవ్రస్థాయిలో విరుచుకుపడ్డారు. సీఎం రేవంత్‌రెడ్డి తన రాజకీయ గురువు చంద్రబాబునాయుడుకు గురుదక్షిణగా తెలంగాణ నీటిని ఆంధ్రప్రదేశ్‌కు ధారాదత్తం చేస్తున్నారని ఆరోపించారు. స్టేషన్‌ ఘన్‌పూర్‌ నియోజకవర్గ కేంద్రంలోని ఎమ్మెల్సీ ఎన్నికల కార్యాలయంలో ఆదివారం నిర్వహించిన గ్రాడ్యుయేట్ ఎమ్మెల్సీ ఓటరు నమోదు సమీక్ష సమావేశంలో ఆయన మాట్లాడారు. మేడిగడ్డ వద్ద ప్రస్తుతం 20 వేల క్యూసెక్కుల నీటి ప్రవాహం ఉందని, జూన్‌ 19న కన్నెపల్లి పంప్‌హౌస్‌ను సందర్శించిన సమయంలోనూ 95 మీటర్ల ఎత్తులో నీటి ప్రవాహం ఉన్నప్పటికీ నీటిని ఎత్తిపోయలేని పరిస్థితి నెలకొందని పేర్కొన్నారు.

నీటిని నిల్వ చేసే ప్రయత్నమే చేయలేదు

రాష్ట్రానికి అందుబాటులో ఉన్న నీటిని సమర్థంగా వినియోగించుకోవడంతోపాటు నిల్వ చేసుకునేందుకు ప్రభుత్వం కనీస ప్రయత్నం కూడా చేయలేదని రాజయ్య విమర్శించారు. సాగునీటి నిర్వహణలో ప్రభుత్వ వైఫల్యం కారణంగా తెలంగాణ రైతులు ఇబ్బందులు పడుతున్నారని అన్నారు. ఇప్పటివరకు సుమారు 750 టీఎంసీల నీరు ఆంధ్రప్రదేశ్‌కు తరలిపోయిందని ఆరోపించారు. నిజంగా ఎల్‌నినో ప్రభావం ఉంటే ఆంధ్రప్రదేశ్‌లో పంటలు ఎలా సమృద్ధిగా పండుతున్నాయని ప్రశ్నించారు. పట్టిసీమ ద్వారా ఆంధ్రప్రదేశ్‌ ప్రభుత్వం సాగునీటిని వినియోగించుకుంటూ వ్యవసాయాన్ని ముందుకు తీసుకెళ్తోందని, తెలంగాణలో మాత్రం ఎల్‌నినో పేరుతో రైతులకు నీరందించడంలో నిర్లక్ష్యం వహిస్తున్నారని మండిపడ్డారు. తెలంగాణ ప్రయోజనాలను పక్కనపెట్టి ఏపీకి నీటిని తరలించడం సరికాదని అన్నారు.

ఎమ్మెల్సీ ఓటరు నమోదుపై సమీక్ష

అనంతరం గ్రాడ్యుయేట్ ఎమ్మెల్సీ ఓటరు నమోదు ప్రక్రియపై పార్టీ మండల ఇన్‌చార్జిలు, సమన్వయ కమిటీ సభ్యులతో రాజయ్య సమీక్ష నిర్వహించారు. నియోజకవర్గంలో ఇప్పటివరకు సుమారు 7,800 మంది పట్టభద్రులు ఓటర్లుగా నమోదు కాగా, దాదాపు 60 శాతం ప్రక్రియ పూర్తయిందని తెలిపారు. మిగిలిన అర్హులైన పట్టభద్రులందరినీ గుర్తించి నమోదు చేయించాలని సూచించారు. ప్రతి ఇన్‌చార్జికి అదనంగా మరో ముగ్గురిని నియమించుకుని, వారి వివరాలను బుధవారం ఉదయం లోపు పార్టీ అధిష్ఠానానికి అందజేయాలని ఆదేశించారు. ఈ కార్యక్రమంలో స్థానిక కౌన్సిలర్లు పొన్న రాజేష్‌, బాలగాని అనిల్‌గౌడ్‌, బూర్ల రాజేశ్వర్‌, జఫర్‌గడ్‌ మండల పార్టీ అధ్యక్షుడు పల్లెపాటి జయపాల్‌రెడ్డి, ధర్మసాగర్‌ మండల కోఆర్డినేటర్‌ గుర్రపు ప్రవీణ్‌, సీనియర్‌ నాయకులు గట్టు శ్రీనివాస్‌ బంగ్లా, 14వ వార్డు కంటెస్టెడ్‌ కౌన్సిలర్‌ మారేడుపాక రమాదేవి, ధర్మసాగర్‌ మండల యువజన విభాగం ఉపాధ్యక్షుడు రాజారపు సుమన్‌, ఘన్‌పూర్‌ మైనార్టీ కన్వీనర్‌ హీరాసింగ్‌ తదితరులు పాల్గొన్నారు.