సమాచార హక్కు చట్టం ప్రజాస్వామ్యానికి రక్షణ కవచం

జనగామ, అక్టోబరు 12 (ప్రజాధ్వని): ప్రభుత్వ పాలనలో పారదర్శకతను పెంపొందించి, అధికారుల జవాబుదారీతనాన్ని నిర్ధారించడంలో సమాచార హక్కు చట్టం (ఆర్టీఐ) కీలక పాత్ర పోషిస్తోందని సమాచార హక్కు చట్ట పరిరక్షణ కమిటీ నాయకులు పేర్కొన్నారు. ప్రజాస్వామ్య వ్యవస్థలో ప్రభుత్వాన్ని ప్రశ్నించే హక్కును సామాన్య పౌరుడికి కల్పించిన శక్తివంతమైన ఆయుధం ఆర్టీఐ చట్టమని స్పష్టం చేశారు. సమాచార హక్కు చట్టం–2005 అమలులోకి వచ్చిన సందర్భంగా సోమవారం జనగామ జిల్లా కేంద్రంలోని అంబేద్కర్ విగ్రహం వద్ద సమాచార హక్కు చట్ట పరిరక్షణ కమిటీ ఆధ్వర్యంలో వేడుకలు నిర్వహించారు. కమిటీ జిల్లా అధ్యక్షుడు మహమ్మద్ జావీద్ ఖాన్ అధ్యక్షతన జరిగిన ఈ కార్యక్రమానికి రాష్ట్ర కమిటీ కార్యదర్శి గోపాలదాస్ ఉపేందర్, జిల్లా ఇన్‌చార్జి నీలం భాస్కర్ ముఖ్య అతిథులుగా హాజరయ్యారు. తొలుత అంబేద్కర్ విగ్రహానికి పూలమాలలు వేసి నివాళులర్పించారు. అనంతరం కేక్ కట్ చేసి వేడుకలు జరుపుకున్నారు. ఈ సందర్భంగా నాయకులు మాట్లాడుతూ ప్రభుత్వ శాఖల పనితీరు, అభివృద్ధి పనులు, సంక్షేమ పథకాల అమలు, ప్రజాధనం వినియోగం వంటి అంశాలపై ప్రతి పౌరుడికి సమాచారం కోరే హక్కు ఉందన్నారు. ప్రభుత్వ నిధుల కేటాయింపులు, ఖర్చులు, అభివృద్ధి పనుల వివరాలు, పథకాల లబ్ధిదారుల ఎంపికలో పారదర్శకత కోసం ఆర్టీఐని సద్వినియోగం చేసుకోవాలని సూచించారు. గ్రామపంచాయతీ నుంచి జిల్లా స్థాయి ప్రభుత్వ కార్యాలయాల వరకు ప్రజలకు సంబంధించిన సమాచారాన్ని చట్ట నిబంధనల ప్రకారం అందించాల్సిన బాధ్యత ప్రజా సమాచార అధికారులపై ఉందన్నారు. సాధారణంగా ఆర్టీఐ దరఖాస్తులకు 30 రోజుల్లో సమాధానం ఇవ్వాల్సి ఉంటుందని, గడువులోగా సమాచారం అందకపోయినా, చట్టబద్ధ కారణాలు లేకుండా నిరాకరించినా అప్పీల్ చేసుకునే అవకాశం ఉందని వివరించారు. గ్రామీణ ప్రాంతాల్లో సమాచార హక్కు చట్టంపై మరింత విస్తృతంగా అవగాహన కల్పించాల్సిన అవసరం ఉందన్నారు. అవినీతి, అక్రమాలు, ప్రజాధనం దుర్వినియోగాన్ని వెలికితీయడంలో ఈ చట్టం కీలక సాధనమని పేర్కొన్నారు. సమాచారాన్ని కోరే పౌరులను ఇబ్బందులకు గురిచేయకుండా, వారి హక్కులను అధికారులు గౌరవించాలని కోరారు. సమాచార హక్కు చట్ట పరిరక్షణ కమిటీ ఆధ్వర్యంలో ప్రజలకు చట్టంపై అవగాహన కల్పించడంతో పాటు ఆర్టీఐ పరిరక్షణకు నిరంతరం కృషి చేస్తామని నాయకులు తెలిపారు. ఈ కార్యక్రమంలో జిల్లా లీగల్ సెల్ కన్వీనర్ సతీష్, జిల్లా ప్రధాన కార్యదర్శి బైరి భరత్, జిల్లా కార్యదర్శులు నల్ల విక్రమ్, గండి నాగరాజు, పట్టణ అధ్యక్షుడు గందమళ్ల కమలాకర్, లింగాలఘణపురం మండల అధ్యక్షుడు మేడ ప్రశాంత్, స్టేషన్ ఘనపూర్ అధ్యక్షుడు మహమ్మద్ సలీం, రఘునాథపల్లి మండల అధ్యక్షుడు కుకుడాల కిరణ్ కుమార్, జేరిపోతుల కుమార్, విద్యావేత్త గుగ్గిళ్ల రవి, నక్క నరేష్, రాష్ట్ర ఉత్తమ రైతు గుగ్గిళ్ల నాగరాజు తదితరులు పాల్గొన్నారు.